Hai eventos aos que vas para escoitar unha charla. E hai outros aos que vas porque sabes que sempre pasa algo. Unha conversa que che abre unha porta, unha persoa que coñeces tomando un café, unha idea que nace entre risas ou ese contacto que acaba converténdose nun cliente, un socio... ou mesmo nun amigo.
Iso é o nosday.
O próximo 19 de setembro, o Auditorio ABANCA de Santiago de Compostela volverá encherse de emprendedores, startups, profesionais da tecnoloxía, persoas investidoras e curiosos con ganas de aprender, compartir e conectar. Un día para falar de emprendemento, innovación e investimento, pero tamén para celebrar que en Galicia hai unha comunidade que non deixa de medrar.
Porque no nosday non vimos vender fume nin contar historias perfectas. Vimos falar das que saen ben... e tamén das que non tanto. Dos erros, das aprendizaxes, das decisións difíciles e desa montaña rusa que supón crear unha empresa. Sen filtros, sen frases feitas e sen PowerPoints imposibles.
A partir das 15:00 horas abriranse as portas para recibir a toda a comunidade e, ás 15:30 horas, comezarán as charlas. Pero quen xa estivo noutras edicións sabe que unha parte moi importante do nosday non está na axenda: está nos corredores, nas pausas para o café, nas conversas improvisadas e na cea de networking coa que pecharemos a xornada a partir das 21:00 horas.
Ao final, iso é o que fai especial este encontro. Que durante unhas horas desaparecen as etiquetas. Aquí non importa se acabas de lanzar a túa startup, se levas anos emprendendo, se traballas nunha gran empresa ou se simplemente tes curiosidade por este mundo. O importante é sentar, conversar e descubrir que sempre hai alguén disposto a compartir unha experiencia, botar unha man ou abrir unha nova oportunidade.
Vémonos en Santiago? 💙🚀
Se estás a estudar e queres vir ao nosday, temos un desconto exclusivo para ti do 50%. Escríbenos ao correo:
nosday23@gmail.com para conseguilo.
