Startups polo miúdo: BENIU, mellorando o campo con drons

“Moita xente fala de innovación, pero nós preferimos facela voar: levamos a tecnoloxía dos drons directamente ao campo para transformar o agro galego.”

“Startups polo miúdo” é unha ventá curiosa e cercana ao talento galego, pensada para coñecer proxectos con ADN tecnolóxico feitos na casa. Facémolo con agarimo e atención, destacando o máis valioso do noso ecosistema: as persoas e todo o que son capaces de crear coa súa paixón e traballo.

Desta vez toca falar con David Blanco, fundador e CEO de BENIU. Que fan? Desenvolven tecnoloxía de drons para sacarlle máis partido ó campo. Imos cas suas respostas!

1.     E logo... que? [Describe cunha frase a túa startup]

[BENIU]: En BENIU empregamos drons para dar solución ao sector agrícola e forestal: realizamos tratamentos fitosanitarios, soltas de organismos de control biolóxico, cartografía e seguimento ambiental. O noso obxectivo é levar esta tecnoloxía directamente ao campo para mellorar rendementos, reducir custos e facelo todo dun xeito máis sostible.

2.     E vos de quen vides sendo? [Describir brevemente o equipo fundador e como se coñeceu, onde estades ubicados..]

[BENIU]: BENIU naceu hai 4 anos co obxectivo de buscar unha aplicabilidade real dos drons no sector agroforestal. Patrik e máis eu coñecémonos traballando nunha das primeiras empresas de drons en España; ao principio participou de maneira intermitente no proxecto, e hai un ano incorporouse xa de forma definitiva.

3. Outra vaca no millo. [Cal foi o problema que queriades resolver cando lanzáchedes o proxecto?]

[BENIU]: A xente vía os drons no campo como algo afastado, moi do futuro, cheo de proxectos de investigación e I+D pero con pouca transferencia real.

O noso obxectivo número un foi baixalo a terra: levar solucións concretas que mellorasen os rendementos e as condicións de traballo. Para iso está a tecnoloxía, para achegar valor real ao sector.

4.     Malo será que non academos... [Próximos pasos. Que obxectivos tedes?]

[BENIU]: Os nosos seguintes pasos son escalar os servizos, especialmente o sistema de solta de organismos beneficiosos (biocontrol con drons), consolidar as unidades operativas en Galicia e Valencia e chegar a abrir no futuro unha terceira en Andalucía.

Hoxe somos tres persoas fixas, pero en picos de traballo chegamos a ser sete, e o noso obxectivo é diversificar cultivos e campañas para evitar eses picos tan altos e conseguir unha actividade máis estable ao longo do ano. Ademais, estamos preparando a nosa primeira rolda de investimento para acelerar o crecemento.

5.     Cantos cartos tedes no banco? [Esta pregunta busca entender en que momento vos atopades: se fixechedes algunha rolda ou estades agora en rolda ou facedes bootstraping. A idea é que respondades unha horquilla ou que digades que agora mesmo "temos pasta porque fixemos a rolda en...." similar. Esto servirá para darvos visibilidade cos inversores :) ]

[BENIU]: Estamos nun momento propio dunha startup en crecemento: con ingresos recorrentes, apoiándonos en aceleradoras e preparando a nosa primeira rolda de investimento para dar o salto e escalar. O importante é que xa temos tracción e clientes públicos e privados que avalan o camiño.

6.   Na miña terra, faise así. [Cáles son os vosos valores? Traballo remoto ou presencial? Como coidades do talento?]

[BENIU]: Os nosos valores son a innovación aplicada, a sostibilidade e a proximidade co cliente. As tarefas dixitais facémolas en remoto, pero o campo hai que pisalo, e aí estamos sempre de forma presencial. Para nós o talento é clave: o crecemento da empresa vai da man do crecemento das persoas que forman parte dela.

Apostamos por unha curva de aprendizaxe completa: quen entra como asistente operativo fórmase e vai asumindo novas funcións pouco a pouco —en aplicación, planificación, análise de datos, mantemento ou coordinación—.

Non todos seguen o mesmo camiño, pero quen demostra compromiso e capacidade ten unha oportunidade real de medrar dentro da empresa.

7.   Son máis listos ca un allo... [Un emprendedor de referencia ao que admires. Por que? Unha startup galega que recomendedes. Por que?]

[BENIU]: Admiro a Emilio Froján, CEO e cofundador de Velca. Sen coñecelo persoalmente, o que transmite é esforzo e humildade, ademáis demostrando a enorme capacidade de levar adiante o proxecto. Os resultados conseguidos son unha barbaridade: en poucos anos, xunto co seu equipo, conseguiu situar Velca como referencia en mobilidade eléctrica e abrir mercado fóra de España. Esa combinación paréceme moi valiosa nun emprendedor.

En canto a startup galega, destacaría Innogando, polo que están a conseguir dende Lugo no sector gandeiro e porque xa levan a súa tecnoloxía a nivel internacional, e tamén Osigris, que desenvolve ferramentas dixitais para mellorar a xestión dos campos agrícolas. As dúas son exemplos claros de que dende Galicia tamén se pode innovar e exportar valor.

8.    A camiño longo pasos pequenos. [Carta aos Reis Magos: Que falta no ecosistema emprendedor galego?]

[BENIU]: O que lle falta ao ecosistema galego é confianza no propio. Aquí hai talento e proxectos potentes, pero moitas veces semella que o de fóra sempre impresiona máis. Ese “ninguén é profeta na súa terra” segue a pesar. Se nos crésemos máis o que temos aquí, sería máis doado apoiar, escalar e facer que as startups galegas brillen tamén dende Galicia.

Moitas grazas a David por achegarnos o seu proxecto!

Seguimos creando espazos para visibilizar historias auténticas de emprendemento feito en Galicia. Tes algo entre mans e queres compartilo? Escríbenos a info@startup.gal — estamos con ganas de coñecer a túa historia.