Startups polo miúdo: Zebra Brain, un segundo cerebro con IA para a tua organización

“As compañías ás veces cústalles moito liderar equipos de investigadores e doutores en ámbitos STEM, xa que están adoitados a ser liderados dende o coñecemento experto.”

“Startups polo miúdo” é unha ventá curiosa e cercana ao talento galego, dende a que nos achegamos con interese a proxectos con ADN tecnolóxico feitos aquí. Facémolo con mimo e atención, destacando o mellor do noso ecosistema: as persoas e todo o que son quen de crear co seu traballo e paixón.

Nesta ocasión falamos con Rocío Vega, cofundadora de Zebra Brain, unha empresa que desenvolve un segundo cerebro con IA para mellorar procesos na tua organización. Imos aló!

1.     E logo... que? [Describe cunha frase a túa startup]

[Zebra Brain]: Somos o teu segundo cerebro: unha boutique que integra axentes de IA nas organizacións.

Facémolo de tres maneiras:

1. Con axentes propios, como Lira, que avalía o desempeño dos empregados a través de competencias e obxectivos, ofrecendo aos directivos información clara para tomar decisións estratéxicas.
   
   

2. Con Form4 analizamos persoas, negocio, procesos e madurez dixital para deseñar a organización obxectivo: aquela que permite acadar os obxectivos corporativos. Acompañamos na execución de todas as accións necesarias para chegar a ela, dende integrar axentes de IA en calquera área do negocio, ata desenvolver diagnósticos de talento, procesos de avaliación de desempeño ou plans de sucesión.
   
   En definitiva, facemos o que faga falta para que a organización chegue ao seu destino con impacto positivo e medible na conta de resultados.
   
   

3. Con Punto+, o noso servizo premium que achega un equipo de doutores en matemáticas e física para resolver problemas de negocio complexos, xusto cando as solucións habituais xa non funcionan ou deixan de ser viables economicamente.
   
   
   
   

2.     E vos de quen vides sendo? [Describir brevemente o equipo fundador e como se coñeceu, onde estades ubicados..]

[Zebra Brain]: Zebra Brain nace da unión de dúas traxectorias complementarias que se cruzaron en   contornas industriais esixentes.

O equipo fundador está formado por Rocío Vega Martínez, asturiana de nacemento e galega de corazón, afincada en Galicia, matemática e doutora en Enxeñaría Matemática, con experiencia internacional en investigación e en proxectos industriais de intelixencia artificial, máis por Alba Budiño Gómez-Naveira, galega, licenciada en Filosofía e graduada en Dereito, cun máster en Dereito de Empresa e un Executive en Recursos Humanos, e unha ampla experiencia na xestión de talento e na transformación organizativa xunto a alta dirección.

Estamos situadas en Galicia, dende onde desenvolvemos proxectos con alcance nacional e internacional, dende o local ata o global.

3. Outra vaca no millo. [Cal foi o problema que queriades resolver cando lanzáchedes o proxecto?]

[Zebra Brain]: O primeiro reto que identificamos foi evidente: as avaliacións de desempeño nas organizacións non estaban a ser útiles. Eran procesos pesados, cheos de sesgos e pouco valiosos tanto para a dirección como para os equipos. De aí naceu Lira, o noso axente de IA, que elimina burocracia e sesgos para ofrecer información continua e obxectiva sobre desempeño.

Agora ben, sabemos que poñer un axente de IA na mesa non é suficiente. E tamén coñecemos outra realidade: ás compañías ás veces cústalles moito liderar equipos de investigadores e doutores en ámbitos STEM, xa que están adoitados a ser liderados dende o coñecemento experto. 

Ademais, as organizacións necesitan acompañamento para que estas tecnoloxías funcionen de verdade, sexan rendibles, capaces de dar respostas innovadoras a retos complexos de negocio, e se integren no día a día sen friccións. Por iso desenvolvemos Form4 e Punto+.

En resumo: axudamos ás empresas a facer da IA e da ciencia aplicada un recurso real, rendible e diferencial, integrando axentes, persoas e coñecemento de forma práctica e sen friccións.

4.     Malo será que non academos... [Próximos pasos. Que obxectivos tedes?]

[Zebra Brain]: Os nosos próximos pasos pasan por consolidar Zebra Brain no mercado nacional e abrir portas a nivel internacional, sempre mantendo o noso modelo boutique.

Queremos que Lira chegue ao mercado comercial no primeiro semestre de 2026, seguir impulsando transformacións organizativas con Form4 e reforzar o noso servizo Punto+ para apoiar ás empresas na resolución de retos complexos de negocio.

En resumo, trátase de crecer con paso firme, pero sen perder a esencia: facer da IA e da ciencia aplicada un recurso útil, rendible e diferencial para as organizacións.

5.     Cantos cartos tedes no banco? [Esta pregunta busca entender en que momento vos atopades: se fixechedes algunha rolda ou estades agora en rolda ou facedes bootstraping. A idea é que respondades unha horquilla ou que digades que agora mesmo "temos pasta porque fixemos a rolda en...." similar. Esto servirá para darvos visibilidade cos inversores :) ]

[Zebra Brain]: Chega para o café… e para transformar unhas cantas empresas.

6.   Na miña terra, faise así. [Cáles son os vosos valores? Traballo remoto ou presencial? Como coidades do talento?]

[Zebra Brain]: En Zebra Brain guiámonos por tres principios: sinxeleza, innovación e persoas. A nosa idea de sinxeleza vén de traducir con método o complexo en decisións claras. A innovación é a aplicación práctica da ciencia e do coñecemento ás organizacións, creando ferramentas e solucións cando hai unha necesidade real. E as persoas están sempre no centro, porque sabemos que detrás de cada modelo ou proceso hai persoas.

Vivimos nunha cultura de aprendizaxe constante, convencidas de que cando asumimos un proxecto é para ir a éxito. Traballamos cun modelo flexible e remoto, apoiado en encontros presenciais cando é necesario. E sempre cun obxectivo claro: que o que facemos teña un impacto positivo e medible nas empresas coas que traballamos.

En definitiva, así pensamos mellor e así axudamos ás empresas a facelo tamén: sendo o seu segundo cerebro.

7.   Son máis listos ca un allo... [Un emprendedor de referencia ao que admires. Por que? Unha startup galega que recomendedes. Por que?]

[Zebra Brain]: Pilar Vila, de Forensic, pola súa integridade e rigor.

8.    A camiño longo pasos pequenos. [Carta aos Reis Magos: Que falta no ecosistema emprendedor galego?]

[Zebra Brain]: Apertura por parte das empresas con capacidade de traccionar, para incorporar o potencial das startups nas súas fases iniciais, e de investidores dispostos a asumir riscos en grandes roldas que permitan escalar.

Mil grazas a Rocío por facer visible o seu proxecto.

Seguimos abrindo espazo para dar a coñecer historias reais de emprendemento feito en Galicia. Tes algo entre mans e queres contárnolo? Escríbenos a info@startup.gal — estamos desexando escoitarte.