Startups polo miúdo: Linknovate, a ferramenta galega de descubrimento de tecnoloxía e mercados

“Startups polo miúdo” é un escaparate íntimo e curioso, pensado para mergullarnos en iniciativas galegas con selo tecnolóxico propio. Achegámonos a cada proxecto con agarimo e interese, resaltando o máis importante do noso ecosistema: as persoas e a paixón que poñen en crear algo novo.

Hoxe falamos con Manuel Noia, o CEO de Linknovate. De seguido nos fala do seu proxecto que axuda a empresas a encontrar os mercados e a tecnoloxía relevante.

1.     E logo... que? [Describe cunha frase a túa startup]

[Linknovate]: Linknovate é unha plataforma de intelixencia competitiva e scouting tecnolóxico que axuda ás empresas a identificar tecnoloxías emerxentes, mercados en crecemento e os actores clave implicados.

2.     E vos de quen vides sendo? [Describir brevemente o equipo fundador e como se coñeceu, onde estades ubicados..]

[Linknovate]: Operamos dende Galicia cun equipo multidisciplinar que combina experiencia en intelixencia artificial, análise de datos e innovación empresarial. O noso propósito é conectar empresas con información clave sobre tendencias, patentes, publicacións científicas e startups innovadoras en sectores como enerxía, saúde e finanzas.

3. Outra vaca no millo. [Cal foi o problema que queriades resolver cando lanzáchedes o proxecto?]

[Linknovate]: O problema que queremos resolver é a dificultade das empresas para estar ao día dos cambios tecnolóxicos e do ecosistema da innovación. Moitas veces, as fontes de información están fragmentadas e non é doado identificar tendencias clave a tempo.

Grazas a algoritmos de intelixencia artificial, en Linknovate analizamos grandes volumes de datos de revistas científicas, bases de patentes e novas en liña para proporcionar insights accionables que axuden a innovadores, investidores e tomadores de decisións a recoñecer oportunidades de mercado.

4.     Malo será que non academos... [Próximos pasos. Que obxectivos tedes?]

[Linknovate]: O noso seguinte gran paso é lanzar un AI Research Assistant, un chatbot intelixente para empresas que facilite o scouting de innovación. Axudará a descubrir que fan os competidores, que startups están emerxendo, que grupos de investigación están na vangarda e que novas oportunidades de mercado aparecen grazas a avances científico-tecnolóxicos.

5.     Cantos cartos tedes no banco? [Esta pregunta busca entender en que momento vos atopades: se fixechedes algunha rolda ou estades agora en rolda ou facedes bootstraping. A idea é que respondades unha horquilla ou que digades que agora mesmo "temos pasta porque fixemos a rolda en...." similar. Esto servirá para darvos visibilidade cos inversores :) ]

[Linknovate]: Estamos operando en modo bootstrapping, pero con suficiente marxe financeira para experimentar con novos produtos e funcionalidades.

6.   Na miña terra, faise así. [Cáles son os vosos valores? Traballo remoto ou presencial? Como coidades do talento?]

[Linknovate]: Apostamos por un modelo de traballo híbrido: quedamos unha vez á semana en persoa, aínda que o equipo de desenvolvemento traballa no mesmo espazo ata 4 o 5 días á semana. Buscamos combinar flexibilidade con colaboración presencial para potenciar a creatividade e a eficiencia.

7.   Son máis listos ca un allo... [Un emprendedor de referencia ao que admires. Por que? Unha startup galega que recomendedes. Por que?]

[Linknovate]: Un emprendedor de referencia: Santi Domínguez de Mestrelab, o "Steve Jobs galego".

Unha startup galega que recomendedes: Barkibu, polo seu uso da IA na saúde das mascotas.

Unha startup galega en fase early stage: Tempos Microscopy, polo seu potencial na nanotecnoloxía.

8.    A camiño longo pasos pequenos. [Carta aos Reis Magos: Que falta no ecosistema emprendedor galego?]

[Linknovate]: No ecosistema emprendedor galego fan falta máis inversores valentes, así como emprendedores e emprendedoras en serie que axuden a crear proxectos e impulsar talento dende Galicia. Porque habelos, hainos.

Agradecémoslle a Manuel as suas verbas!

Continuamos abrindo camiño para compartir relatos auténticos do emprendemento feito na nosa terra. Tes unha idea ou proxecto que che gustaría amosar? Escríbenos a info@startup.gal — estamos con ganas de escoitar a túa historia.